
ຖ້າເວົ້າເຖິງຮ້ານອາຫານທີ່ບໍ່ແມ່ນພຽງສະຖານທີ່ກິນອາຫານ ແຕ່ເປັນ “ເລື່ອງເລົ່າ” ທີ່ມີຊີວິດ Cafe Pushkin ຄືໜຶ່ງໃນຮ້ານທີ່ສະທ້ອນຄວາມງົດງາມຂອງປະຫວັດສາດ ວັນນະກຳ ດົນຕີ ແລະ ລົດນິຍົມຊັ້ນສູງຂອງຣັດເຊຍໄດ້ຢ່າງສົມບູນແບບ
ເລື່ອງລາວທັງໝົດເລີ່ມຕົ້ນຂຶ້ນເມື່ອກວ່າ 50 ປີກ່ອນ ເມື່ອ ກິລແບຣ໌ ເບໂກ (Gilbert Becaud) ນັກຮ້ອງເພງຊອງຊົງຊື່ດັງຊາວຝຣັ່ງ ເດີນທາງມາເຢືອນນະຄອນມອສໂກ
ລະຫວ່າງການເດີນທາງ ລາວໄດ້ຮູ້ຈັກກັບຜູ້ປະສານງານສາວຊາວຣັດເຊຍຊື່ ນາຕາເລຍ (Natalia) ຄວາມປະທັບໃຈໃນການຍ່າງຫຼິ້ນຜ່ານນະຄອນຫຼວງຂອງຣັດເຊຍ ການລົມກັນເລື່ອງປະຫວັດສາດ ການປະຕິວັດ ແລະ ບັນຍາກາດຂອງເມືອງ ໄດ້ກາຍເປັນແຮງບັນດານໃຈໃຫ້ລາວແຕ່ງເພງຊື່ “Natalie” ຫຼັງຈາກກັບໄປຝຣັ່ງ
ໃນເນື້ອເພງ ມີທ່ອນໜຶ່ງທີ່ກາຍເປັນຕຳນານວ່າ
“ຊ່າງໜ້າຊື່ນຊົມແທ້ ຖ້າໄດ້ຢູ່ກັບເຈົ້າໃນ ‘ຄາເຟ່ປູຊກິນ’ ເບິ່ງຫິມະທີ່ຕົກລົງນອກປ່ອງຢ້ຽມ ດື່ມຊັອກໂກແລັດຮ້ອນ ແລະ ລົມກັນເລື່ອງອື່ນໆ …”
ເພງ “Natalie” ໄດ້ຮັບຄວາມນິຍົມຢ່າງສູງໃນຝຣັ່ງ ຈົນເມື່ອຊາວຝຣັ່ງເດີນທາງມາຍັງມອສໂກ ພວກເຂົາຕ່າງພາກັນຊອກຫາ “Cafe Pushkin” ຕາມຊື່ທີ່ປາກົດໃນເພງ ແຕ່ກັບບໍ່ພົບ
ເພາະໃນເວລານັ້ນ ຄາເຟ່ແຫ່ງນີ້ຍັງເປັນພຽງຈິນຕະນາການໃນບົດກະວີເທົ່ານັ້ນ
ເຖິງຢ່າງໃດກໍ່ຕາມ ບົດເພງນີ້ແຫຼະທີ່ຈຸດປະກາຍຄວາມຄິດໃຫ້ ອັນເດຣ໌ ເດລລອສ (Andrei Dellos) ນັກທຸລະກິດຜູ້ຫຼົງໄຫຼໃນສິລະປະວັດທະນະທຳລັດເຊຍ ສ້າງຮ້ານອາຫານທີ່ບໍ່ພຽງແຕ່ຕອບສະໜອງຄວາມຝັນໃນເພງ
ແຕ່ຍັງຟື້ນຄືນຊີວິດໃຫ້ກັບອາຫານລັດເຊຍແບບຊົນຊັ້ນຂຸນນາງໃນອະດີດ
ໃນວັນທີ 4 ມິຖຸນາ ຄ.ສ. 1999 ເທິງຖະໜົນ Tverskaya Boulevard ພາຍໃນຄະເຫສະຖານສະໄຕບາໂຣກອັນສະຫງ່າງາມ ຮ້ານ Cafe Pushkin ໄດ້ເປີດປະຕູຕ້ອນຮັບແຂກຢ່າງເປັນທາງການ ແລະ ໃນວັນເປີດຮ້ານນັ້ນເອງ ກິລແບຣ໌ ເບໂກ ໄດ້ມາຮ່ວມຮ້ອງເພງ “Natalie” ດ້ວຍຕົນເອງ ຄືກັບວ່າບົດເພງໄດ້ກາຍເປັນຄວາມຈິງ
Cafe Pushkin ບໍ່ໄດ້ຕັ້ງຢູ່ໃນທຳເລທຳມະດາ ເພາະຖະໜົນ Tverskaya Boulevard ແລະ ບໍລິເວນອ້ອມຂ້າງຖືເປັນພື້ນທີ່ທີ່ມີຄວາມສຳຄັນຢ່າງເລິກເຊິ່ງໃນຊີວິດຂອງກະວີເອກແຫ່ງລັດເຊຍ ອາເລັກຊານເດີ ເຊີເກເຢວິຊ ພຸດຊະກິນ (A.S. Pushkin) ຖະໜົນສາຍນີ້ເປີດໃຊ້ຕັ້ງແຕ່ປີ ຄ.ສ. 1796 ແລະ ເຄີຍເປັນບ່ອນຍ່າງຫຼິ້ນຂອງຊົນຊັ້ນສູງ ບຸກຄົນສຳຄັນ ແລະ ສິລະປິນມີຊື່ຂອງນະຄອນມອສໂກ ພຸດຊະກິນເອງກໍ່ເຄີຍມາໃຊ້ເວລາຢູ່ຖະໜົນສາຍນີ້ຫຼາຍຄັ້ງ
ໃນບໍລິເວນໃກ້ຄຽງ ເຊິ່ງເຄີຍເປັນຄະເຫສະຖານຂອງຕະກູນ ໂຄໂລນເຢຟ (ສະຖານທີ່ທີ່ປັດຈຸບັນແມ່ນໂຮງລະຄອນ Moscow Art Theatre) ເຄີຍມີການຈັດງານເຕັ້ນລຳສຳລັບເດັກປີລະສອງຄັ້ງ ໂດຍມີຄູສອນເຕັ້ນຊື່ດັງ ໂຢເຄລ (Yokel) ເປັນຜູ້ສອນລູກຫຼານຂອງຊົນຊັ້ນສູງຈາກມອສໂກ ແລະ ເຊນປີເຕີສເບີກ ແລະ ໃນງານເຕັ້ນລຳຄັ້ງໜຶ່ງນັ້ນເອງ ພຸດຊະກິນໄດ້ພົບກັບຍິງສາວອາຍຸພຽງ 16 ປີ ຜູ້ທີ່ຕໍ່ມາໄດ້ກາຍເປັນພັນລະຍາຂອງລາວ ຄື ນາຕາເລຍ ກອນຊາໂຣວາ
ຍິ່ງໄປກວ່ານັ້ນ ທີ່ຕົ້ນຖະໜົນໃກ້ ປະຕູນິກິດສກີ (Nikitsky Gate) ຍັງເປັນສະຖານທີ່ທີ່ພຸດຊະກິນ ແລະ ພັນລະຍາເຂົ້າພິທີສົມລົດ ແລະ ໃນອະດີດ ອະນຸສາວະລີຂອງພຸດຊະກິນກໍ່ເຄີຍຕັ້ງຢູ່ເທິງຖະໜົນສາຍນີ້ເຊັ່ນກັນ
ທຸກມື້ນີ້ Cafe Pushkin ບໍ່ໄດ້ເປັນພຽງຮ້ານອາຫານ ແຕ່ເປັນສະຖານທີ່ທີ່ຜູ້ມາຢ້ຽມຢາມໄດ້ “ລິ້ມລົດປະຫວັດສາດ” ຜ່ານອາຫານລັດເຊຍຊັ້ນສູງ ບັນຍາກາດຫຼູຫຼາແບບສະຕະວັດທີ 19 ແລະ ເລື່ອງເລົ່າທີ່ເຊື່ອມໂຍງບົດເພງ ວັນນະກຳ ແລະ ຄວາມຊົງຈຳຂອງນະຄອນມອສໂກເຂົ້າໄວ້ນຳກັນຢ່າງງົດງາມ
ສຳລັບນັກທ່ອງທ່ຽວທີ່ຕ້ອງການສຳຜັດລັດເຊຍໃນແງ່ມຸມທີ່ເລິກເຊິ່ງກວ່າການທ່ອງທ່ຽວທົ່ວໄປ Cafe Pushkin ແມ່ນໜຶ່ງໃນສະຖານທີ່ທີ່ບໍ່ຄວນພາດ ເພາະທີ່ນີ້ບໍ່ໄດ້ເສີບແຕ່ອາຫານ ແຕ່ເສີບ “ເລື່ອງລາວ” ທີ່ຍັງມີຊີວິດມາຈົນເຖິງທຸກມື້ນີ້

Contact
ວາງແຜນທ່ຽວເອງກໍສະດວກ
ສິ່ງທີ່ຄົນໄປທ່ຽວເອງມັກຕ້ອງຈອງກ່ອນເດີນທາງ ພວກເຮົາຄັດຜູ້ໃຫ້ບໍລິການທີ່ໃຊ້ໄດ້ແທ້ໄວ້ໃຫ້
ລິ້ງພັນທະມິດ · ພວກເຮົາອາດໄດ້ຄ່າຕອບແທນເລັກນ້ອຍເມື່ອທ່ານຈອງ ໂດຍລາຄາຂອງທ່ານບໍ່ປ່ຽນ
ໃຫ້ຣິນອອກແບບທຣິບໃຫ້ຄະນະຂອງທ່ານ