ເອເຈນຊີໄທເຕືອນ ທ່ຽວເມືອງອັນຕະລາຍ ຢ່າໂພສຕ໌ເຟສ ສ່ຽງຖືກຕິດຕາມໂຕ

ເອເຈນຊີໄທເຕືອນ ທ່ຽວເມືອງອັນຕະລາຍ ຢ່າໂພສຕ໌ເຟສ ສ່ຽງຖືກຕິດຕາມໂຕ

ທ່ານນາງ ເນດນະພາ ແກ້ວແສງທຳ ຜູ້ບໍລິຫານ ບໍລິສັດ See You Again ຈຳກັດ ເປີດເຜີຍກໍລະນີມີນັກເດີນທາງຈາກປະເທດໄທ ຖືກຈັບເພື່ອເອົາຄ່າໄຖ່ຢູ່ຕ່າງປະເທດວ່າ ກະແສການຖືກຈັບເອົາຄ່າໄຖ່ ໃນຕ່າງແດນ ໃນບາງປະເທດນັ້ນ ມີມາຫຼາຍປີແລ້ວ

ພຽງແຕ່ຄົນໄທ ຍັງບໍ່ເຄີຍເປັນກະແສຂ່າວ ທີ່ຜ່ານມາ ມີເຫດການເກີດຂຶ້ນເລື້ອຍໆ ເຊັ່ນ ໃນປະເທດອີຢິບ ມີມາຫຼາຍປີແລ້ວ ແລະ ມີເປັນໄລຍະໆ ແລະ ໃນປະເທດອາຟຣິກາ ໂດຍສະເພາະໃນປະເທດມາລີທີ່ເປັນຂ່າວ ພົບເລື້ອຍຫຼາຍ ຈົນຄົນຕາເວັນຕົກຫຼີກລ່ຽງ ແທບບໍ່ມີຄົນໄປທ່ຽວ

ການເດີນທາງແບບກຸ່ມນ້ອຍ ທີ່ອອກແບບເສັ້ນທາງທ່ຽວເອງ ມັກອອກນອກເສັ້ນທາງທົວປົກກະຕິ ເຮັດໃຫ້ມີຈຸດອ່ອນເລື່ອງຄວາມປອດໄພໃນປະເທດທີ່ມີຄວາມສ່ຽງຕ່າງໆ ເພາະນັກເດີນທາງທີ່ມັກເດີນທາງອິດສະຫຼະ ມີຄວາມໝັ້ນໃຈເປັນທຶນເດີມຢູ່ແລ້ວ ເປັນໜ້າທີ່ຂອງເອເຈນຊີທ້ອງຖິ່ນ ທີ່ຈະຄອຍເບິ່ງແຍງ ແລະ ປະສານງານໃກ້ຊິດກັບທ້ອງຖິ່ນ ອີກທັງຄວນເຕືອນ ແລະ ຫຼີກລ່ຽງເສັ້ນທາງທີ່ມີຄວາມສ່ຽງ ເພາະຖ້າເກີດຫຍັງຂຶ້ນ ກໍລະນີແບບນີ້ແກ້ໄຂຍາກຫຼາຍ

“ໂດຍປົກກະຕິ ທົວຈະບໍ່ສ່ຽງພານັກທ່ອງທ່ຽວໄປໃນພື້ນທີ່ອັນຕະລາຍ ເພາະໄດ້ບໍ່ຄຸ້ມເສຍ ແລະ ມີປະເທດ ເສັ້ນທາງອີກຫຼາຍຢ່າງ ທີ່ລໍໃຫ້ໄປທ່ຽວ ແລະ ເຮັດການຕະຫຼາດ ຈັນຍາບັນຂໍ້ທຳອິດ ຄືຄວາມປອດໄພຂອງນັກເດີນທາງ”

ສິ່ງສຳຄັນຄື ຖ້າເດີນທາງຄົນດຽວ ໃນປະເທດທີ່ມີຄວາມສ່ຽງ ບໍ່ຄວນໂພສຕ໌ຮູບ ຫຼື tag ສະຖານທີ່ຕ່າງໆ ແບບ real time ເພາະພວກເອົາຄ່າໄຖ່ ສາມາດກວດເສັ້ນທາງຊີວິດ ແລະ ຄາດການຖານະຂອງຜູ້ເດີນທາງໄດ້ຢ່າງງ່າຍດາຍ ໃນປັດຈຸບັນ ບັນຫາຂອງນັກທ່ອງທ່ຽວທີ່ເດີນທາງຄົນດຽວນັ້ນ ມີແອັບພລິເຄຊັນຫຼາຍໂຕ ທີ່ຊ່ວຍລົງທະບຽນ ແລະ ຕິດຕາມໂຕໄດ້ ນັກເດີນທາງອິດສະຫຼະມືອາຊີບຄວນກຽມການໃຫ້ດີ

ນອກຈາກເລື່ອງບັນຫາຈັບໂຕນັກທ່ອງທ່ຽວເອົາຄ່າໄຖ່ແລ້ວ ບັນຫາດ້ານຄວາມປອດໄພຂອງລູກຄ້າໃນຍຸກໜ້າ ທີ່ຄວນຮຽນຮູ້ຍັງມີອີກຫຼາຍຢ່າງ ເຊັ່ນ ຄວາມສ່ຽງໃນກິດຈະກຳຜາດໂຜນຕ່າງໆ ທີ່ຄົນໄທບໍ່ມີພື້ນຖານມາກ່ອນ ເຊັ່ນ ການຍ່າງພູສູງ ການຫຼິ້ນລົດໄຟປີນພູຕ່າງໆ ການຂຶ້ນບານລູນ ເຮືອບິນນ້ອຍ

"ພວກເຮົາເຄີຍຫ້າມບໍ່ໃຫ້ລູກຄ້າຂຶ້ນເຮລິຄອບເຕີໃນເດືອນທັນວາໃນປະເທດໄອສແລນ ທີ່ພວກເຮົາຮູ້ວ່າ ຈະມີລົມແຮງຫຼາຍ ແລະ ຕ້ອງທັກທ້ວງຫຼາຍຄັ້ງ ລູກຄ້າຈຶ່ງຍອມຍົກເລີກ ແລະ ໃນອາທິດຕໍ່ມາ ກໍມີເຫດເຮລິຄອບເຕີຕົກແທ້ໆ ໃນໄອສແລນ ບໍລິສັດທົວຄວນຄຳນຶງເຖິງຄວາມປອດໄພເປັນຫຼັກ ທັກທ້ວງລູກຄ້າ ແລະ ໃຫ້ຄຳແນະນຳໃຫ້ຊັດເຈນ ເຊັ່ນ ໃນປະເທດອີຢິບ ບໍ່ຄວນເດີນທາງອິດສະຫຼະ ໂດຍບໍ່ມີຜູ້ປະສານງານ ຫຼື ແຖບແຄສເມຍ ບໍ່ອອກນອກເສັ້ນທາງ ໃນຊ່ວງເວລາກຳນົດ ເປັນຕົ້ນ”

“ການເດີນທາງຕາມຖະໜົນຕ້ອງຫູໄວຕາໄວ ເພາະໄພສະໄໝໃໝ່ ມາຫຼາກຫຼາຍຮູບແບບ ຄວນສັງເກດເຫດການຜິດປົກກະຕິ ເຊັ່ນ ເມື່ອປີທີ່ມີເຫດລະເບີດໃນມິວນິກ ຜູ້ປະສານງານທ້ອງຖິ່ນຂອງພວກເຮົາ ເຫັນຄວາມຜິດປົກກະຕິ ຮີບພາລູກທົວເຂົ້າຫຼັງຮ້ານຂາຍຢາ ຈຶ່ງລອດເຫດລະເບີດກາງເມືອງໄດ້ ຄົນຂັບລົດກໍມີສະຕິ ຫາຈັງຫວະຮີບໄປຮັບຄະນະທົວອອກມາ”

ການຫຼີກລ່ຽງອັນຕະລາຍ ລະຫວ່າງເດີນທາງ ເປັນທັກສະສຳຄັນໃນຍຸກໜ້າ ສິ່ງທີ່ຄວນລະວັງ ຄື ຮູ້ຈັກພື້ນທີ່ ລະວັງການໃຊ້ social ແລະ ບໍ່ຄວນກົ້ມໜ້າ ເບິ່ງແຕ່ມືຖື ຖ່າຍຮູບ ຈົນລືມເບິ່ງເຫດການສະເພາະໜ້າ