ລະດູການຂອງປະເທດເຊັກ

ເຊື່ອວ່າກ່ອນທີ່ໝູ່ເພື່ອນຈະວາງແຜນໄປທ່ຽວບ່ອນໃດບ່ອນໜຶ່ງ ສິ່ງທີ່ສຳຄັນບໍ່ແພ້ສະຖານທີ່ທ່ອງທ່ຽວເລີຍ ກໍຄືອາກາດ ເພາະການຮູ້ພະຍາກອນອາກາດລ່ວງໜ້າ ຈະເຮັດໃຫ້ເຮົາກະກຽມຕົວໄດ້ຖືກ ບໍ່ວ່າຈະເປັນເຄື່ອງນຸ່ງຫົ່ມຕ່າງໆ ໃຫ້ເໝາະກັບລະດູການ ແລະ ສະພາບການໃນຕອນນັ້ນ ເມື່ອທຸກຢ່າງພ້ອມ ຂໍ້ມູນພ້ອມ ກາຍພ້ອມ ໃຈພ້ອມ ກໍລຸຍເລີຍ ດັ່ງນັ້ນ See You Again ຈຶ່ງຢາກນຳພະຍາກອນອາກາດມາບອກໝູ່ເພື່ອນລ່ວງໜ້າກ່ອນອອກທຣິບ

ສະພາບອາກາດຂອງປະເທດເຊັກ ແບ່ງເປັນ 4 ລະດູ ປົກກະຕິຄືກັບຫຼາຍປະເທດ ໂດຍມີອຸນຫະພູມຕ່ຳສຸດໃນລະດູໜາວປະມານ -15 ອົງສາເຊ ແລະ ສູງສຸດໃນລະດູຮ້ອນປະມານ 30 ອົງສາເຊ ອຸນຫະພູມສະເລ່ຍໂດຍທົ່ວໄປປະມານ 15-20 ອົງສາເຊ ອາກາດຄ່ອນຂ້າງເຢັນສະບາຍ ຄືກັບໄດ້ຍ່າງຫຼິ້ນເທິງ ຂົວຊາລ໌ (Charles Bridge) ໃນອາກາດທີ່ເຢັນຄືເປີດແອຢູ່ໃນຫ້ອງການ ແລະ ມັກຈະມີຝົນຕົກໃນລະດູຮ້ອນ ແລະ ລະດູໃບໄມ້ຫຼົ່ນ ເຊິ່ງບໍ່ເປັນບັນຫາ ຖ້າເຮົາພົກຄັນຮົ່ມ ເຖິງເວລາແລ້ວ ມາເບິ່ງລາຍລະອຽດຂອງແຕ່ລະລະດູກັນເລີຍ

1 ລະດູຮ້ອນ (ຮ້ອນຫຼາຍ ຮ້ອນຄືໄປຍ່າງຕະຫຼາດກາງແຈ້ງຕອນ 12 ໂມງ)

ລະດູຮ້ອນຂອງປະເທດເຊັກ ຈະເລີ່ມແຕ່ເດືອນມິຖຸນາຈົນຮອດກາງເດືອນກັນຍາ ລວມທັງໝົດ 4 ເດືອນ ແລະ ບາງມື້ອຸນຫະພູມອາດພຸ່ງສູງເຖິງ 35 ອົງສາເລີຍ ສິ່ງສຳຄັນທີ່ຄວນກະກຽມກ່ອນອອກທຣິບໃນແຕ່ລະມື້ ຄືນ້ຳດື່ມ ເມື່ອຮູ້ສຶກຮ້ອນເກີນໄປໃຫ້ຫຍິບນ້ຳອອກມາຈິບເລື້ອຍໆ ຈະເຮັດໃຫ້ຮ່າງກາຍຮູ້ສຶກດີ ແລະ ແວ່ນຕາ ຄີມກັນແດດ ສິ່ງປ້ອງກັນ UV ຕ່າງໆທີ່ສາວໆຮູ້ດີຢູ່ແລ້ວ ແລະ ອາດມີຝົນຕົກຄືກັນ ນອກຈາກນີ້ຟ້າຈະມືດຊ້າທີ່ສຸດ ຄືຕາເວັນຈະຕົກປະມານ 21:15 ໂມງ ແຕ່ຊ້າກ່ອນ ຢ່າເພິ່ນຕັດສິນວ່າລະດູນີ້ບໍ່ໜ້າທ່ຽວ ຂໍ້ດີຂອງລະດູນີ້ຄືຮ້ານຄ້າຕ່າງໆຈະເປີດໃຫ້ບໍລິການນອກຮ້ານ ທັງກາເຟ ຫຼື ອາຫານ ນັ່ງເບິ່ງວິວ ແລະ ຜູ້ຄົນຍ່າງຜ່ານໄປມາໄດ້ ອອກມາເຮັດກິດຈະກຳກາງແຈ້ງ ແລະ ບອກເລີຍວ່າແສງຊ່ວງ summer ຖ່າຍຮູບອອກມາຂຶ້ນກ້ອງຫຼາຍ ຮັບປະກັນເລີຍວ່າຕ້ອງເປັນ summer ທີ່ໜ້າຈົດຈຳແນ່ນອນ

2 ລະດູໃບໄມ້ປົ່ງ (ບໍ່ຮ້ອນຫຼາຍ ບໍ່ໜາວຫຼາຍ)

ລະດູນີ້ອາກາດຈະປານກາງ ບໍ່ຮ້ອນຫຼາຍ ບໍ່ໜາວຫຼາຍ ສົດຊື່ນ ຍ່າງຫຼິ້ນສະບາຍສຸດໆ ຊ່ວງຕົ້ນລະດູໃບໄມ້ປົ່ງອາກາດຍັງເຢັນຢູ່ບາງ ແລະ ຈະເລີ່ມອຸ່ນຂຶ້ນເລື້ອຍໆໃນເດືອນມີນາ ສ່ວນອາກາດຕອນກາງຄືນຈະຄ່ອນຂ້າງໜາວ ແຕ່ກໍຍັງສະບາຍຢູ່ ເດືອນພຶດສະພາຕອນກາງເວັນອາກາດຈະເຢັນສະບາຍ ໂປ່ງໃສ ແລະ ທ້ອງຟ້າຈະເລີ່ມມືດຊ້າລົງ ແລະ ມືດຕອນ 2 ທຸ່ມ ລະດູນີ້ຕົ້ນໄມ້ຈະເລີ່ມແຕກໃບ ທົ່ງນາເລີ່ມມີຫຍ້າສີຂຽວອ່ອນສີຂຽວແກ່ສະຫຼັບກັນໄປມາ ແລະ ຕົ້ນໄມ້ດອກໄມ້ນາໆພັນ ກໍຈະພ້ອມໃຈກັນອອກມາບານ ຮັບແສງຕາເວັນ ສູດອາກາດໂປ່ງໃສຂອງລະດູໃບໄມ້ປົ່ງນີ້ ດອກໄມ້ໃບຫຍ້າກໍຈະບານສະພັ່ງເຫັນເປັນສີສັນສວຍງາມໄປທົ່ວທຸກແຫ່ງ ໃຜທີ່ມັກດອກໄມ້ສວຍໆຕ້ອງຫ້າມພາດເດີ້

3 ລະດູໃບໄມ້ຫຼົ່ນ (ເລີ່ມເຂົ້າໜ້າໜາວແລ້ວ ໜາວແບບເສື້ອສະເວດເຕີຍັງໄຫວ)

ລະດູໃບໄມ້ຫຼົ່ນຂອງປະເທດເຊັກ ເລີ່ມຕົ້ນໃນຊ່ວງເດືອນກັນຍາຈົນຮອດທ້າຍເດືອນພະຈິກ ອາກາດໃນລະດູໃບໄມ້ຫຼົ່ນຍັງອົບອຸ່ນຢູ່ ແລະ ຍັງມີແສງແດດພໍໃຫ້ຕົ້ນໄມ້ໄດ້ສັງເຄາະແສງຢູ່ບາງ ແຕ່ເມື່ອເຂົ້າລະດູໃບໄມ້ຫຼົ່ນເຕັມຕົວອາກາດຈະຄ່ອຍໆເຢັນລົງ ກາງເວັນຈະສັ້ນລົງ ກາງຄືນຈະຍາວຂຶ້ນ ເຊິ່ງພືດພັນຕ່າງໆຈະຮູ້ຕົວແລ້ວວ່າຈະຕ້ອງພົບກັບສະພາບອາກາດທີ່ໂຫດຮ້າຍ ຈຶ່ງຕ້ອງເລີ່ມຜັດໃບອອກເພື່ອຈະບໍ່ໃຊ້ພະລັງງານຫຼາຍ ແລະ ຢູ່ລອດຕໍ່ໄປ ໝູ່ເພື່ອນຈຶ່ງຈະໄດ້ພົບກັບໃບໄມ້ທີ່ເລີ່ມປ່ຽນສີເປັນສີເຫຼືອງ ສີສົ້ມສົດ ໃນມື້ທີ່ມີແສງແດດຈະເຫັນທິວທັດທີ່ສວຍງາມ ແລະ ຕົ້ນໄມ້ສີສວຍສົດສະຫຼັບສີກັນຢູ່ເທິງຕົ້ນຄືກັບຮູບແຕ້ມ ແລະ ຕັ້ງແຕ່ເດືອນຕຸລາ ອຸນຫະພູມຈະເລີ່ມຫຼຸດຕ່ຳລົງເຖິງ 0 ອົງສາ ແລະ ເດືອນພະຈິກອາກາດຈະເລີ່ມໜາວເຢັນໃນເວລາກາງຄືນ ແລະ ອາດຈະມີຫິມະຄັ້ງທຳອິດຕົກລົງມາໃນຊ່ວງນີ້

4 ລະດູໜາວ (ເສື້ອຄໍເຕົ່າ ເສື້ອໂຄັດ ຕ້ອງມາແລ້ວລະດູນີ້)

ໃນປະເທດເຊັກ ຊ່ວງນີ້ຈະໜາວຫຼາຍແທ້ໆ ອຸນຫະພູມຕ່ຳກວ່າສູນ ຈະມີຫິມະຕົກໃນລະດູໜາວ ແລະ ຈະມືດໄວກວ່າລະດູອື່ນໆ ເນື່ອງຈາກຕາເວັນຈະຕົກປະມານ 4 ໂມງແລງ ສະຖານທີ່ທ່ອງທ່ຽວຫຼາຍແຫ່ງຈະປິດໄວຕາມໄປດ້ວຍ ຫຼື ບາງແຫ່ງຈະປິດທຳການໃນຊ່ວງລະດູໜາວເລີຍ ແຕ່ຂໍ້ດີຄື ທີ່ພັກຈະລາຄາຖືກກວ່າລະດູອື່ນໆ ແລະ ມີເທດສະການສຳຄັນຫຼາຍຢ່າງ ເຊັ່ນ ຄຣິດສະມາດ ທັງເມືອງຈະຖືກປະດັບຕົກແຕ່ງດ້ວຍໄຟ ແລະ ຕົ້ນຄຣິດສະມາດ ເຊິ່ງເປັນພາບທີ່ອົບອຸ່ນ ແລະ ມ່ວນຫຼາຍ ແລະ ໃນລະດູໜາວຍັງມີກິດຈະກຳທີ່ໜ້າສົນໃຈ ນັ້ນກໍຄືສະເກັດນ້ຳກ້ອນກາງແຈ້ງ ຫຼື ຈະຂຶ້ນພູໄປຫຼິ້ນສະກີ ສະໂນບອດ ຫຼື ສະໄລເດີຫິມະ ເຄື່ອງນຸ່ງຕ້ອງເປັນເສື້ອໂຄັດໜາໆ ເກີບທີ່ໃສ່ແລ້ວອຸ່ນ ກະກຽມໃຫ້ພ້ອມເລີຍ

ທົວເຊັກສ່ວນຕົວກັບມືອາຊີບ............................................