ທົວສ່ວນຕົວ (ITA008) ເອີຣົບ ແກຣນອິຕາລີ 9 ມື້ 8 ຄືນ

ມື້ທຳອິດຂອງການເດີນທາງ ພວກເຮົາລໍຖ້າຮັບທ່ານທີ່ສະໜາມບິນກຸງໂຣມ ປະເທດອິຕາລີ (Leonardo da Vinci-Fiumicino Airport) ພາທ່ານອອກເດີນທາງໄປຍັງນະຄອນປົມເປອີ (Pompeii) ໄລຍະທາງ 242 ກິໂລແມັດ ໃຊ້ເວລາເດີນທາງ 2 ຊົ່ວໂມງ 50 ນາທີ ປົມເປອີເປັນເມືອງໂຣມັນບູຮານທີ່ຖືກພູເຂົາໄຟວິຊູວຽດທັບດ້ວຍລາວາຈົນເມືອງຫາຍໄປທັງເມືອງໃນຊົ່ວຂ້າມຄືນ ຊົມຊາກເມືອງບູຮານທີ່ຖືກຂຸດຂຶ້ນພາຍຫຼັງ ຕຶກຮາມບ້ານຊ່ອງ ວິຫານເທບພະເຈົ້າ ຕະຫຼາດ ໂຮງລະຄອນບູຮານ ເຄື່ອງໃຊ້ຕ່າງໆ ທີ່ນັກໂບຣານຄະດີໄດ້ຂຸດຄົ້ນພົບໂດຍມີສະພາບທີ່ຍັງສົມບູນຢ່າງໜ້າອັດສະຈັນຍິ່ງ

ຈາກນັ້ນພາທ່ານເດີນທາງຕໍ່ໄປຍັງເມືອງຊໍເຣັນໂຕ (Sorrento) ທີ່ຢູ່ຫ່າງອອກໄປພຽງ 27 ກິໂລແມັດ ເປັນເມືອງໂຣແມນຕິກ ເມືອງຕາກອາກາດແຄມທະເລທາງພາກໃຕ້ຂອງອິຕາລີ ຊົມເມືອງຄາວໜຶ່ງແລ້ວລົງເຮືອເຟີຣີເພື່ອໄປທ່ຽວເກາະຄາປຣີ (Capri) ເກາະສະຫວັນທາງພາກໃຕ້ຂອງອິຕາລີ ນັ່ງລົດລາງຂຶ້ນສູ່ຍອດພູຄາປຣີເພື່ອຊົມວິວຈາກມຸມສູງ ຍ່າງຊົມຕົວເມືອງຄາປຣີທີ່ມີບັນຍາກາດໂຣແມນຕິກ ຖ່າຍຮູບຄູ່ກັບສັນຍາລັກຂອງເກາະຄາປຣີ ຄື ສວນອອກຸດສຕາ ກັບໂງ່ນຫີນ FARAGLIONI

hotel ພັກແຮມ Capri · ຕົວຢ່າງໂຮງແຮມ Hotel San Michele ***

ມື້ນີ້ພາທ່ຽວຊົມເກາະ Capri ຊົມຖ້ຳບລູກຣັອດໂຕ (Grotta Azzurra) ເປັນໜຶ່ງໃນຖ້ຳນ້ອຍໃຫຍ່ຫຼາຍກວ່າ 10 ແຫ່ງ ທີ່ເກາະຄາປຣີ ເຫດທີ່ຖ້ຳແຫ່ງນີ້ແຕກຕ່າງຈາກແຫ່ງອື່ນຈົນມີຊື່ສຽງໂດ່ງດັງໄປທົ່ວໂລກ ເນື່ອງຈາກພາຍໃນຖ້ຳແຫ່ງນີ້ຖືກປົກຄຸມດ້ວຍແສງສີຟ້າງາມ ທີ່ເກີດຈາກສີຂອງນ້ຳທະເລສະທ້ອນກັບແສງຕາເວັນທີ່ສາດສ່ອງເຂົ້າມາຈາກປາກທາງເຂົ້າຖ້ຳ ເກີດເປັນພາບມະຫັດສະຈັນ ທີ່ສ້າງຄວາມປະທັບໃຈໃຫ້ແກ່ຜູ້ທີ່ໄດ້ເຫັນ ການເຂົ້າໄປຊົມຄວາມງາມໃນຖ້ຳແຫ່ງນີ້ ນັກທ່ອງທ່ຽວມັກຈະພາຍເຮືອລອດເຂົ້າໄປໃນຖ້ຳທີ່ສູງຈາກລະດັບນ້ຳທະເລພຽງເມັດກວ່າໆ ດັ່ງນັ້ນຈຶ່ງຕ້ອງຂຶ້ນຢູ່ກັບສະພາບອາກາດ, ລະດັບນ້ຳຂຶ້ນ-ລົງ ແລະ ສະພາບຂອງຄື້ນທະເລໃນມື້ນັ້ນໆ ນຳວ່າສາມາດເຂົ້າໄປໃນຖ້ຳໄດ້ຫຼືບໍ່

ຈາກນັ້ນພາທ່ານອອກເດີນທາງຈາກເກາະຄາປຣີມຸ່ງໜ້າສູ່ເມືອງ Naples ຊົມຈັດຕຸລັດຫຼັກຂອງເມືອງເນເປິນທີ່ເອີ້ນວ່າ Piazza del plebiscito ຊົມ National Archaeological Museum ພິພິທະພັນໂບຣານຄະດີແຫ່ງຊາດ ເປັນອາຄານທົງເກົ່າສີແດງ ທີ່ເກັບຊິ້ນງານສິລະປະ ແລະ ຮູບປັ້ນ ເຊິ່ງສ່ວນໃຫຍ່ຖືກນຳມາຈາກຊາກປັກຫັກພັງຂອງປົມເປອີ ໂດຍພາຍໃນເຕັມໄປດ້ວຍຮູບປັ້ນຂະໜາດໃຫຍ່ຍັກ ທີ່ເຮັດໃຫ້ທ່ານຮູ້ສຶກວ່າຕົນເອງນ້ອຍແທ້ໆ ນັ່ງລົດລາງຂຶ້ນໄປຊົມຄວາມງາມຂອງເນເປິນຈາກມຸມສູງ ທີ່ຈຸດຊົມວິວຄາສເຕວ ຊານເອໂລໂມ (Castel Sant'Elmo) ຈາກນັ້ນພາຊົມໂບດປະຈຳເມືອງເນເປິນ ຫຼື Naples Duomo (Duomo di Napoli) ເຊິ່ງໂບດແຫ່ງນີ້ເປັນສູນລວມໃຈຂອງຊາວຄຣິດສະຕຽນຊາວເນເປິນມາດົນນານ

ເຖິງເວລາອັນຄວນ ພາທ່ານອອກເດີນທາງກັບມາຍັງກຸງໂຣມ (Rome) ນະຄອນຫຼວງຂອງປະເທດອິຕາລີ "ທຸກຖະໜົນມຸ່ງສູ່ກຸງໂຣມ" ເປັນຈິງຕັ້ງແຕ່ອະດີດຈົນເຖິງປັດຈຸບັນ ໂຣມຍັງຄົງເປັນເມືອງໜຶ່ງທີ່ມີນັກທ່ອງທ່ຽວເດີນທາງມາຫຼາຍທີ່ສຸດ ເປັນເມືອງທີ່ມີຄວາມສຳຄັນຫຼາຍທາງປະຫວັດສາດ ມີປະຫວັດຍາວນານມາກວ່າ 2,800 ປີ ພາທ່ານຊົມນ້ຳພຸເທຣວີ (Trevi Fountain) ທີ່ມີຄວາມເຊື່ອວ່າຖ້າໃຜອະທິຖານ ແລະ ຫັນຫຼັງໂຍນດ້ວຍມືຂວາໃຫ້ເຫຼັຽນຂ້າມບ່າຊ້າຍໄປ ເຊື່ອວ່າຈະເຮັດໃຫ້ໄດ້ກັບມາກຸງໂຣມອີກຄັ້ງ

ຈາກນັ້ນນຳທ່ານຊົມຂັ້ນໄດສະເປນ (Spanish Steps) ເຊິ່ງເປັນຈຸດນັດພົບຂອງໜຸ່ມສາວຊາວອິຕາລີ ຊັອບປິ້ງຢູ່ຖະໜົນແຟຊັນເວຍ ຄອນດັອດຕິ (Via Condotti) ທີ່ເຕັມໄປດ້ວຍຮ້ານຫຼູຫຼາທີ່ສຸດໃນກຸງໂຣມ ແລະ ຮ້ານຄ້າແບຣນດັງຊັ້ນນຳຢູ່ຖະໜົນແຫ່ງນີ້

hotel ພັກແຮມ Rome · ຕົວຢ່າງໂຮງແຮມ Hotel Giotto ***

ມື້ນີ້ພາຊົມນະຄອນລັດວາຕິກັນ (Vatican City) ຕັ້ງຢູ່ໃນກຸງໂຣມ ເປັນທີ່ປະທັບຂອງສັນຕະປາປາ ເຊິ່ງເປັນປະມຸກຂອງສາສະໜາຄຣິດນິກາຍໂຣມັນຄາໂທລິກ ຈັດວ່າເປັນປະເທດທີ່ນ້ອຍທີ່ສຸດໃນໂລກ (0.44 ຕາລາງກິໂລແມັດ) ໂດຍມີສູນກາງຄື St. Peter's Basilica ພາຊົມ Vatican Museum ເປັນພິພິທະພັນຂະໜາດໃຫຍ່ທີ່ລວບລວມງານສິລະປະຫຼາຍຢ່າງໄວ້ຫຼາຍ ໂດຍມີຫ້ອງທີ່ເປັນໄຮໄລທ໌ຄື Sistine Chapel ເຊິ່ງມີຮູບແຕ້ມທີ່ໂດ່ງດັງຄື The Creation of Adam ຊົມ St. Peter's Square ແລະ St. Peter's Basilica ສັນຍາລັກຂອງການມາຢ້ຽມຢາມນະຄອນລັດວາຕິກັນ ຂຶ້ນຂັ້ນໄດຈຳນວນ 551 ຂັ້ນຂຶ້ນໄປຍອດໂດມເພື່ອຊົມວິວມຸມສູງ ແນມຍ້ອນອອກມາເຫັນຈັດຕຸລັດທີ່ງາມ ແລະ ຍິ່ງໃຫຍ່

ຈາກນັ້ນກັບເຂົ້າມາທ່ຽວຍັງກຸງໂຣມ ພາຊົມ Colosseum ເຊິ່ງເປັນສະໜາມກິລາກາງແຈ້ງຂະໜາດໃຫຍ່ໃຈກາງກຸງໂຣມ ໃຊ້ໃນການປະລອງຂອງເຫຼົ່າ gladiator, ສັດປ່າ ແລະ ສັດຮ້າຍຕ່າງໆ ສ້າງແລ້ວເສັດຕັ້ງແຕ່ປີ ຄ.ສ. 80 ຄັນຊົມເປັນຮູບວົງຮີ ວັດອ້ອມໄດ້ 527 ແມັດ ສູງ 57 ແມັດ ຈຸຄົນໄດ້ຫຼາຍກວ່າ 60,000 ຄົນ ທີ່ນີ້ໄດ້ຮັບການຄັດເລືອກເປັນ 1 ໃນ 7 ສິ່ງມະຫັດສະຈັນຂອງໂລກຍຸກໃໝ່ເມື່ອປີ ພ.ສ. 2550

ຈາກນັ້ນ ພາຊົມ Roman Forum ຖືວ່າເປັນສູນກາງດ້ານຕ່າງໆ ເຊັ່ນ ການປະຊຸມທາງການເມືອງ ການປົກຄອງ ບູຊາເທບພະເຈົ້າ ແລະ ອື່ນໆ ຂອງກຸງໂຣມໃນສະໄໝບູຮານ ໃຊ້ເວລາສ້າງຍາວນານເຖິງ 900 ປີ ປັດຈຸບັນເຫຼືອແຕ່ຊາກປັກຫັກພັງ ແຕ່ກໍຍັງຮູ້ສຶກໄດ້ເຖິງຄວາມຍິ່ງໃຫຍ່ອະລັງການ ແລະ ພາຊົມຈຸດຊົມວິວເທິງ Palatine Hill ແນມລົງມາເຫັນ Roman Forum ແລະ Colosseum ທີ່ງາມ

ຈາກນັ້ນອອກເດີນທາງໄປຍັງ Siena ໄລຍະທາງ 223 ກິໂລແມັດ ໃຊ້ເວລາເດີນທາງ 2 ຊົ່ວໂມງເຄິ່ງ ເພື່ອພັກຄ້າງຄືນທີ່ເມືອງນີ້

hotel ພັກແຮມ Siena · ຕົວຢ່າງໂຮງແຮມ Hotel Sangallo Park ***

ມື້ນີ້ທ່ຽວເມືອງ Siena ໃນຕອນເຊົ້າ ພາຊົມ Piazza Del Campo ເປັນເດີ່ນຂະໜາດໃຫຍ່ໃຈກາງເມືອງ ພາຊົມ Fonte Gaia (Fountain of Joy) ສ້າງຂຶ້ນໃນປີ 1419 ບໍລິເວນນີ້ເປັນຈຸດສິ້ນສຸດຂອງລະບົບທໍ່ນ້ຳປະປາທີ່ນຳນ້ຳສະອາດເຂົ້າສູ່ໃຈກາງເມືອງ ເພື່ອໃຫ້ປະຊາຊົນໄດ້ໃຊ້ນ້ຳພຸນີ້ ຮູບຮ່າງເປັນສີ່ຫຼ່ຽມເຮັດຈາກຫີນອ່ອນ ປະດັບດ້ວຍຫີນແກະສະຫຼັກເປັນຮູບຕ່າງໆ ພາຊົມ Palazzo Pubblico ສ້າງໃນປີ 1297 ເຄີຍໃຊ້ເປັນບ່ອນເຮັດວຽກຂອງລັດຖະບານໃນສະໄໝຍຸກກາງ ຫຼື Councilof Nine ດ້ານນອກຂອງປາສາດສະແດງເຖິງສະຖາປັດຕະຍະກຳໃນຍຸກກາງໄດ້ດີ ໂດຍໄດ້ຮັບອິດທິພົນສິລະປະສະໄຕ Gothic ດ້ານລຸ່ມສ້າງດ້ວຍຫີນ ສູງຂຶ້ນໄປໃຊ້ດິນຈີ່ ຊຸ້ມປະຕູໂຄ້ງທີ່ເຫັນຈະໂຄ້ງເຂົ້າກວ່າປົກກະຕິເລັກນ້ອຍ ເພື່ອໃຫ້ຮັບກັບການໂຄ້ງອອກຂອງ Palazzo del Campo ສ່ວນ Torre del Mangia ສ້າງລະຫວ່າງປີ 1325 ຫາປີ 1344 ທີ່ຕັ້ງໃຈສ້າງໃຫ້ສູງກວ່າທຸກຫໍຄອຍໃນເມືອງໃກ້ຄຽງ ເຊິ່ງກໍຕັ້ງໃຈສ້າງໃຫ້ສູງກວ່າຫໍຄອຍໃນ Florence ຈາກນັ້ນພາຊົມ Piazza Del Duomo ເປັນສິລະປະແບບ Siena ຄືເອົາສິລະປະແບບ Gothic ມາດັດແປງ ສ້າງປີ 1215 ຫາປີ 1263 ປະກອບດ້ວຍ 3 ສ່ວນ Duomo, Bell Tower, Baptistery

ຈາກນັ້ນ ອອກເດີນທາງໄປຍັງເມືອງ San Gimignano ໄລຍະທາງ 58 ກິໂລແມັດ ໃຊ້ເວລາເດີນທາງປະມານ 1 ຊົ່ວໂມງ ຍ່າງທ່ຽວຊົມເມືອງ San Gimignano ເຊິ່ງເປັນເມືອງບູຮານໃນແຄວ້ນທັສຄານີ ຕັ້ງຢູ່ເທິງເນີນພູທີ່ອ້ອມຮອບດ້ວຍກຳແພງເມືອງບູຮານ ຊົມຫໍຄອຍທີ່ສູງສະຫງ່າ 14 ຫໍ ຊົມໂບດປະຈຳເມືອງ San Gimignano Duomo (Collegiate Church of San Gimignano) ທີ່ຕັ້ງຢູ່ໃນເດີ່ນດູໂອໂມ (Piazza Del Duomo) ຊົມພາຍນອກພະລາດຊະວັງໂປໂປໂລ (Popolo Palace)

ຈາກນັ້ນເດີນທາງຕໍ່ໄປຍັງເມືອງປີຊາ (Pisa) ໄລຍະທາງ 177 ກິໂລແມັດ ໃຊ້ເວລາເດີນທາງປະມານ 1 ຊົ່ວໂມງກວ່າ Pisa ຖືກປະກາດເປັນມໍລະດົກໂລກຕັ້ງແຕ່ປີ 1987 ພາຊົມໂບດນ້ອຍໆທີ່ຊື່ Santa Maria della Spina ຂ້າງແມ່ນ້ຳ Arno ຈາກນັ້ນພາຊົມຫໍເອນປີຊາອັນໂດ່ງດັງ (Leaning Tower of Pisa) ສ້າງແລ້ວເສັດເມື່ອປີ 1350 (ໃຊ້ເວລາສ້າງ 177 ປີ) ເປັນຫໍຮູບຊົງກະບອກ 8 ຊັ້ນ ສ້າງດ້ວຍຫີນອ່ອນສີຂາວ ສູງ 55 ແມັດ ມີຂັ້ນໄດ 293 ຂັ້ນ ແລະ ເອນຈົນຍອດຫໍອອກຫ່າງຈາກແນວກາງ 3.9 ແມັດ ຫໍນີ້ບໍ່ໄດ້ຕັ້ງໃຈສ້າງໃຫ້ເອນ ແຕ່ເລີ່ມເອນຕັ້ງແຕ່ການສ້າງເຖິງຊັ້ນທີ 3 ເນື່ອງຈາກພື້ນດິນເປັນດິນອ່ອນເຮັດໃຫ້ຈົມລົງ ໃນບໍລິເວນດຽວກັນຊົມໂບດ Duomo di Pisa (Pisa Cathedral) ແລະ Baptistery ຫຼື ຫໍລ້າງບາບ ຫຼື ຫໍສີນຈຸ່ມຢູ່ທາງດ້ານຕາເວັນຕົກຂອງໂບດ ເຊິ່ງມີອ່າງສີນຈຸ່ມຢູ່ໃຈກາງ ທີ່ປີຊາຫໍນີ້ຈະມີຮູບຮ່າງມົນ ໃຊ້ສຳລັບຮຽນຄຳສອນ ແລະ ຮັບສີນຈຸ່ມ

hotel ພັກແຮມ Pisa · ຕົວຢ່າງໂຮງແຮມ Calamidoro Hotel ****

ມື້ນີ້ພາທ່ານອອກເດີນທາງມາທ່ຽວເມືອງ Florence ຫຼື Firenze ໃນພາສາອິຕາລີ ໄລຍະທາງ 90 ກິໂລແມັດ ໃຊ້ເວລາເດີນທາງ 1 ຊົ່ວໂມງ 20 ນາທີ Florence ເປັນເມືອງແຫ່ງສິລະປະ ຕັ້ງຢູ່ແຄມຝັ່ງຂອງແມ່ນ້ຳ Arno ເຊິ່ງເມື່ອກ່ອນເປັນສູນກາງທາງການຄ້າ ແລະ ເປັນຈຸດກຳເນີດຂອງສິລະປະ ແລະ ສະຖາປັດຕະຍະກຳແຂນງຕ່າງໆ ປັດຈຸບັນເປັນມໍລະດົກໂລກຕັ້ງແຕ່ປີ 1982 ພາຊົມ Piazza Michelangelo ເປັນຈຸດຊົມວິວທີ່ຈະແນມຍ້ອນໄປເຫັນວິວມຸມກວ້າງຂອງເມືອງ Florence ຫຼັງຄາເປັນສີສົ້ມໂທນດຽວກັນທັງເມືອງ ແລະ ມີໂດມຂອງ Duomo ໂດດເດັ່ນສະງ່າງາມ ຕອນກາງຄືນພໍເປີດໄຟຍິ່ງເດັ່ນຂຶ້ນໄປອີກ

ຊົມ Duomo ທີ່ມີຂະໜາດໃຫຍ່ ໃກ້ກັນຊົມ Ponte Vecchio ເຊິ່ງເປັນຂົວທີ່ເປັນສັນຍາລັກຂອງເມືອງນີ້ ສ້າງຂຶ້ນເພື່ອໃຊ້ຂ້າມແມ່ນ້ຳ Arno ເຊິ່ງມີຄວາມພິເສດຕ່າງຈາກຂົວທົ່ວໄປຄື ມີຮ້ານຄ້າຢູ່ສອງຂ້າງທາງ ສະໄໝກ່ອນເປັນທີ່ຕັ້ງຂອງຮ້ານຂາຍຊີ້ນສັດ ແຕ່ປັດຈຸບັນກາຍເປັນແຫຼ່ງຮ້ານຄ້າພວກງານສິລະປະ ແລະ ເຄື່ອງປະດັບອັນມີຄ່າ

ພາຊົມ Piazza della Signoria ພາຊົມໂບດ Santa Maria Novella ທີ່ຢູ່ໃກ້ກັບສະຖານີລົດໄຟ ຝາດ້ານໜ້າຂອງໂບດເຮັດດ້ວຍຫີນອ່ອນສີຂາວສະຫຼັບເປັນລາຍກັບສີຂຽວ ຊົມຈັດຕຸລັດ Piazza del Duomo ຖືເປັນຈັດຕຸລັດທີ່ມີສະຖານທີ່ທີ່ມີສະຖາປັດຕະຍະກຳທີ່ເປັນສັນຍາລັກຂອງສິລະປະ Renaissance ແລະ ຊົມມະຫາວິຫານ Santa Maria del Fiore Cathedral ເປັນມະຫາວິຫານທີ່ມີຂະໜາດໃຫຍ່ເປັນອັນດັບທີ 4 ຂອງເອີຣົບ

hotel ພັກແຮມ Florence · ຕົວຢ່າງໂຮງແຮມ Ih Hotels Firenze Business ****

ມື້ນີ້ພາທ່ານອອກເດີນທາງສູ່ເມືອງເວນິສ (Venice) ໄລຍະທາງ 256 ກິໂລແມັດ ໃຊ້ເວລາເດີນທາງ 2 ຊົ່ວໂມງ 40 ນາທີ ເກາະເວນິສ (Venice) ຕັ້ງຢູ່ໃນທະເລເອເດຣຍຕິກ (Adriatic Sea) ເປັນສະຖານທີ່ທ່ອງທ່ຽວທີ່ດັງທີ່ສຸດຂອງອິຕາລີ ຕົວເມືອງສ້າງຂຶ້ນເທິງເກາະທີ່ເຮັດຈາກເສົາໄມ້ ຈຶ່ງໃກ້ຮອດເວລາທີ່ຈະຈົມລົງໃນອີກບໍ່ເທົ່າໃດສິບປີ ເມືອງແຫ່ງສາຍນ້ຳ ເອກະລັກບໍ່ຄືໃຜ ບໍ່ມີຖະໜົນໃຫ້ລົດແລ່ນ ມີແຕ່ຄອງ ແລະ ເຮືອກອນໂດລາ ບ້ານເຮືອນເກົ່າແກ່ ເກາະ ຂົວ ຕະຫຼາດ ແລະ ໂບດວັງຕ່າງໆ ຢູ່ລວມກັນຢ່າງອະລັງການ

ນັ່ງເຮືອຊົມແກຣນ ຄານານ (Grand Canal) ຈາກນັ້ນຍ່າງຊົມເກາະເວນິສຄົບໄຮໄລທ໌ ໄດ້ແກ່ ໂບດຊານມາໂຄ ມະຫາວິຫານຊານມາໂຄ ໂບດສຳຄັນແຫ່ງເມືອງເວນິສ ຫຼັງຄາຂອງມະຫາວິຫານຊານມາໂຄສ້າງແບບໂດມສຸເຫຼົ່າຂອງສາສະໜາອິດສະລາມ ໂດມກາງມີຂະໜາດໃຫຍ່ທີ່ສຸດ ປະດັບໂມເຊກສີຄຳເຫຼື້ອມຕັ້ງແຕ່ຫຼັງຄາຈົນເຖິງພື້ນ ຈຶ່ງໄດ້ຮັບສະມຍານາມວ່າ “Church of Gold” ຊົມພະລາດຊະວັງດອຈ ເປັນພະລາດຊະວັງສະໄຕໂກຕິກ ຂອງດຸກຜູ້ປົກຄອງເມືອງເວນິສ ພາຍໃນພະລາດຊະວັງປະດັບດ້ວຍຄຳ ແລະ ມີພາບຈິດຕະກຳຫຼາຍ

ຊົມຂົວຊື່ດັງ ຂົວຣີອັລໂຕ ທີ່ນັກທ່ອງທ່ຽວນິຍົມແວະມາຖ່າຍຮູບຫຼາຍທີ່ສຸດ ເຊິ່ງອີກ 2 ຂົວທີ່ມີຊື່ສຽງ ຄື Accademia Bridge ແລະ Scalzi Bridge ເພາະຂົວແຫ່ງນີ້ມີຄວາມເກົ່າແກ່ທີ່ສຸດ

ຂຶ້ນຫໍລະຄັງຊານມາໂຄ ສູງເຖິງ 98 ແມັດ ທີ່ຕັ້ງຢູ່ດ້ານໜ້າມະຫາວິຫານຊານມາໂຄ ທີ່ນີ້ເປັນອີກແລນມາກທີ່ນັກທ່ອງທ່ຽວນິຍົມມາຖ່າຍຮູບ ແລະ ຍັງເປັນຈຸດທີ່ນັກທ່ອງທ່ຽວສາມາດຍ່າງຂຶ້ນຂັ້ນໄດໄປຊົມວິວງາມໆຂອງເມືອງເວນິສ

ອິດສະຫຼະຊັອບປິ້ງຕາມອັທຍາໄສ ແລະ ຕອນແລງ ຊົມຄອນເສີດຖ້າຕ້ອງການ

hotel ພັກແຮມ ເວນິສ (Venice) ໂຮງແຮມຕົວຢ່າງ Smart Hotel Holiday ****

ມື້ນີ້ພາທ່ານເດີນທາງໄປເມືອງເວໂຣນາ (Verona) ໄລຍະທາງ 112 ກິໂລແມັດ ໃຊ້ເວລາເດີນທາງ 1 ຊົ່ວໂມງ 10 ນາທີ ເຊິ່ງເປັນເມືອງມໍລະດົກໂລກທີ່ຕັ້ງຢູ່ທາງພາກເໜືອຂອງອິຕາລີ ແລະ ໃຫຍ່ເປັນອັນດັບສອງຮອງຈາກເວນິສ. ເມືອງ Verona ມີຊື່ສຽງຈາກຮູບເງົາເລື່ອງ ໂຣມີໂອ ແລະ ຈູເລຍ. ຜ່ານພາຊົມ Arena di Verona ເປັນສະໜາມກິລາໂຣມັນເກົ່າແກ່ ສ້າງຂຶ້ນຕັ້ງແຕ່ສະໄໝສັດຕະວັດທີ 1 ໃຫຍ່ຮອງຈາກໂຄລອດຊຽມທີ່ກຸງໂຣມ ແລະ ສະໜາມອາຣີນາໃນເມືອງນີມສ໌ ປະເທດຝຣັ່ງເທົ່ານັ້ນ. ຊົມຈັດຕຸລັດໃຫຍ່ Piazza delle Erbe ຖ່າຍຮູບກັບໜ້າເຮືອນຂອງຈູເລຍ ທີ່ເປັນຕຶກແຖວຍຸກກາງ ເລກທີ 23 ເທິງຖະໜົນຄັບເປັນໂລ. ຊົມໂບດ Verona Cathedral

ຈາກນັ້ນເດີນທາງຕໍ່ໄປຍັງເມືອງຊີຣ໌ມີໂອເນ (Sermione) ໄລຍະທາງ 53 ກິໂລແມັດ ໃຊ້ເວລາເດີນທາງປະມານ 40 ນາທີ. Sermione ເປັນເມືອງຕິດກັບທະເລສາບ Lake Garda ເຊິ່ງເປັນທະເລສາບທີ່ໃຫຍ່ທີ່ສຸດຂອງອິຕາລີ ເປັນເມືອງທີ່ງາມ ແລະ ເກົ່າແກ່ ມີອາຍຸຫຼາຍກວ່າ 2,000 ປີ ເປັນເມືອງໜຶ່ງທີ່ນັກທ່ອງທ່ຽວນິຍົມຫຼາຍທີ່ສຸດ ເພາະຕົວເມືອງເປັນແຫຼມຍື່ນເຂົ້າໄປໃນທະເລສາບ ເບິ່ງແປກຕາ ຕົວເມືອງເກົ່າແກ່ ມີນ້ຳລ້ອມຮອບ ຖືເປັນມຸມທີ່ມີສະເໜ່ຫຼາຍ. ຍ່າງຫຼິ້ນໃນເຂດເມືອງເກົ່າ ແລະ ຕາມຮິມທະເລສາບ

ຕອນແລງພາທ່ານເດີນທາງໄປເມືອງມີລານ (Milan) ໄລຍະທາງ 145 ກິໂລແມັດ ໃຊ້ເວລາເດີນທາງເກືອບ 2 ຊົ່ວໂມງ ແລະ ພັກຄ້າງຄືນທີ່ນີ້

hotel ພັກແຮມ Milan · ຕົວຢ່າງໂຮງແຮມ Centro Siloe Residence ****

ມື້ນີ້ພາທ່ານອອກເດີນທາງໄປທ່ຽວທະເລສາບ Lake Como ໄລຍະທາງ 84 ກິໂລແມັດຈາກມີລານ ໃຊ້ເວລາເດີນທາງ 1 ຊົ່ວໂມງ 40 ນາທີ. ທະເລສາບໂຄໂມຕັ້ງຢູ່ທາງພາກເໜືອຂອງອິຕາລີ ເປັນສະຖານທີ່ຖ່າຍທຳຮູບເງົາເຈມສ໌ ບອນ ຖືເປັນທະເລສາບທີ່ໃຫຍ່ອັນດັບສາມຂອງອິຕາລີ ຢູ່ໃກ້ຊາຍແດນສະວິດເຊີແລນ. ພາຊົມເມືອງນ້ອຍໆ ໜ້າຮັກຮອບທະເລສາບໂຄໂມທີ່ມີຊື່ສຽງທີ່ສຸດ ເຊັ່ນ ເບລລາໂຈ (Bellagio) ແລະ ເມືອງວາເຣນນາ (Varenna) ແລະ ພານັ່ງເຮືອ Taxi ໄປຊົມວິນລ້າກາງທະເລສາບ. ຖ້າມີເວລາເຫຼືອ ພາຊົມວິນລ້າທີ່ມີຊື່ສຽງໃນເກາະ ໄດ້ແກ່ ວິນລ້າ Villa Carlotta ແລະ Villa del Balbianello ຫຼື ທ່ານອາດເລືອກຊົມເມືອງເລນໂນ (Lenno) ແທນກໍໄດ້

ເດີນທາງກັບສູ່ເມືອງມີລານ (Milan) ເມືອງຫຼວງດ້ານແຟຊັນຂອງໂລກ ພາທ່ານຊົມຄວາມຍິ່ງໃຫຍ່ອະລັງການຂອງມະຫາວິຫານ Duomo ເປັນມະຫາວິຫານແບບໂກຕິກທີ່ໃຫຍ່ທີ່ສຸດໃນໂລກ ກໍ່ສ້າງຕັ້ງແຕ່ປີ 1386 ກວ່າຈະສຳເລັດສົມບູນໃຊ້ເວລາເຖິງ 427 ປີ. ວັດສະດຸທີ່ໃຊ້ເປັນຫີນອ່ອນເກືອບທັງຫຼັງ ສູງ 157 ແມັດ ກວ້າງ 92 ແມັດ ຫຼັງຄາ ແລະ ຕົວອາຄານດ້ານນອກເຮັດເປັນຍອດແຫຼມເປັນຮູບໄພ່ພົນອົງຕ່າງໆ 135 ຍອດ ມີຮູບສະຫຼັກພະແມ່ມາຣີສູງ 4 ແມັດຫຸ້ມດ້ວຍຄຳທັງອົງ ຢູ່ສູງສຸດ

ຍ່າງຫຼິ້ນຈັດຕຸລັດ Piazza Duomo ທີ່ຢູ່ດ້ານໜ້າມະຫາວິຫານ ມີພະບໍລົມຮູບຊົງມ້າຂອງກະສັດ Vittorio Emanuele II (ພາສາອັງກິດ Victor Emanuel II) ປະດິດສະຖານຢູ່ກາງລານກວ້າງ ເປັນຜູ້ທີ່ກໍ່ຕັ້ງປະເທດອິຕາລີຂຶ້ນມາ ຈາກການລວມແຄວ້ນຕ່າງໆ ເຂົ້າດ້ວຍກັນຈົນກາຍເປັນປະເທດອິຕາລີ

ຊ໊ອບປິ້ງທີ່ອາຄານ Galleria Vittorio Emanuele II ຕົວອາຄານມີຄວາມຫຼູຫຼາ ສວຍສະຫງ່າ ເຊິ່ງເປັນ shopping mall ທີ່ເກົ່າແກ່ທີ່ສຸດໃນໂລກ ສ້າງຂຶ້ນໃນປີ 1865 ໂດຍຕັ້ງຊື່ເພື່ອເປັນກຽດແກ່ກະສັດ Vittorio Emanuele II ເປັນອາຄານໂຄງເຫຼັກກ໊ອບດ້ວຍແກ້ວ ຫຼັງຄາມີໂດມຢູ່ກາງ ພື້ນປູດ້ວຍຫີນອ່ອນ ແລະ ຫີນແກຣນິດ ຝາຜະໜັງຕົກແຕ່ງດ້ວຍຮູບໂມເຊກ ແລະ ລວດລາຍປູນປັ້ນທີ່ງາມ ມີຮ້ານຄ້າແຟຊັນຫຼາຍຢ່າງ ໂດຍສະເພາະແບຣນເນມທີ່ມີຊື່ສຽງຂອງອິຕາລີ ແລະ ມີຮ້ານອາຫານ ຮ້ານກາເຟ

ມື້ນີ້ບໍ່ມີທົວ ພວກເຮົາພາທ່ານໄປສົ່ງທີ່ສະໜາມບິນ Milan Airport ຕາມເວລາທີ່ກຳນົດ

hotel ພັກແຮມ Milan · ຕົວຢ່າງໂຮງແຮມ Centro Siloe Residence **** 9 Milan Airport