ທົວສ່ວນຕົວເອີຣົບ (REJ002) ທົວໄອສ໌ແລນສ່ວນຕົວ ເຈາະເລິກດິນແດນແຫ່ງນ້ຳກ້ອນ ແລະ ໄຟ (8 ມື້ 7 ຄືນ)

ເຊົ້າ​ມື້ທຳອິດເລີ່ມຕົ້ນທີ່ສະໜາມບິນສາກົນ Keflavik International Airport ກ່ອນອອກເດີນທາງມຸ່ງໜ້າສູ່ທິດຕາເວັນຕົກ ຖະໜົນສາຍຍາວຄ່ອຍໆ ພາພວກເຮົາອອກຈາກເມືອງຫຼວງ ສູ່ພູມິປະເທດທີ່ປ່ຽນໄປຢ່າງວ່ອງໄວ ຈາກທົ່ງຫຍ້າໂລ່ງກວ້າງສູ່ລາວາບູຮານສີດຳສະໜິດ ເຂົ້າສູ່ຄາບສະໝຸດ Snaefellsnes Peninsula ດິນແດນທີ່ຜູ້ຄົນເອີ້ນວ່າ “Iceland in Miniature” ຍ້ອນທຸກພາບຈຳຂອງປະເທດນີ້ຖືກລວມໄວ້ທີ່ນີ້ ທັງພູເຂົາໄຟ ທານນ້ຳກ້ອນ ທະເລ ແລະ ທົ່ງລາວາອັນເວິ້ງວ້າງ ພວກເຮົາຂັບເລາະແຄມຝັ່ງໄປຈົນຮອດພູເຂົາທີ່ທຸກຄົນລໍຄອຍ — Kirkjufell ພູເຂົາຊົງໝວກແມ່ມົດທີ່ຕັ້ງສະຫງ່າແຄມທະເລ ພາບເງົາຂອງມັນສະທ້ອນກັບທ້ອງຟ້າກວ້າງ ແລະ ນ້ຳຕົກນ້ອຍເບື້ອງໜ້າ ເປັນພາບທີ່ຄືຫຼຸດອອກມາຈາກຮູບເງົາແຟນຕາຊີ ແລະ ທີ່ນີ້ເອງເຄີຍເປັນໜຶ່ງໃນສາກຖ່າຍທຳຂອງ Game of Thrones ຈາກນັ້ນເສັ້ນທາງພາພວກເຮົາຜ່ານທົ່ງລາວາບູຮານ Berserkjahraun ພື້ນດິນຂຣຸຂຣະຖືກປົກຄຸມດ້ວຍມອສສີຂຽວໜານຸ້ມດັ່ງພົມທຳມະຊາດ ບັນຍາກາດງຽບສະຫງົບ ລຶກລັບ ແລະ ງົດງາມແບບດິບໆ ຄືກຳລັງຂັບລົດຢູ່ເທິງອີກດາວເຄາະໜຶ່ງ ຕອນບ່າຍເດີນທາງຕໍ່ໄປຍັງໝູ່ບ້ານແຄມທະເລ Arnarstapi ບ່ອນທີ່ໜ້າຜາຫີນບາຊອນຖືກຄື້ນແອັດແລນຕິກກັດເຊາະຈົນເກີດເປັນຊຸ້ມໂຄ້ງ ແລະ ຮູບຊົງແປກຕາ ຍ່າງຫຼິ້ນລຽບແຄມຝັ່ງ ຟັງສຽງລົມແຮງປະທະໂງ່ນຫີນ ແລະ ມອງທະເລກວ້າງສຸດສາຍຕາ ຄວາມດິບຂອງທຳມະຊາດທີ່ນີ້ທັງສະຫງົບ ແລະ ຊົງພະລັງໃນເວລາດຽວກັນ ແສງແລງຄ່ອຍໆ ຕົກກະທົບຜືນນ້ຳ ກ່ອນພວກເຮົາເດີນທາງເຂົ້າສູ່ເມືອງນ້ອຍແຄມທະເລເພື່ອພັກຜ່ອນໃນຄ່ຳຄືນນີ້ ພັກບໍລິເວນເມືອງ Grundarfjorour ຫຼື Stykkisholmur

ເຊົ້າມື້ນີ້ພວກເຮົາອອກເດີນທາງຕໍ່ຂຶ້ນສູ່ທິດເໜືອ ເສັ້ນທາງຄົດລ້ຽວຕັດຜ່ານຮ່ອມພູ ແລະ ສາຍພູສູງ ພູມສັນຖານຄ່ອຍໆ ປ່ຽນຈາກຊາຍຝັ່ງສູ່ດິນແດນທີ່ງຽບສະຫງົບ ແລະ ກວ້າງໄກຂຶ້ນທຸກຂະນະ

ທ້ອງຟ້າກວ້າງ ແລະ ແສງທຳມະຊາດຂອງໄອສແລນ ເຮັດໃຫ້ທຸກຊ່ວງເວລາລະຫວ່າງທາງກາຍເປັນຮູບຖ່າຍທີ່ງາມໂດຍບໍ່ຕ້ອງຕັ້ງໃຈ

ເສັ້ນທາງພາພວກເຮົາມາຮອດນ້ຳຕົກໃນຕຳນານ GoOafoss ຫຼື “Waterfall of the Gods” ສາຍນ້ຳສີຂາວໄຫຼໂຄ້ງເປັນຮູບເຄິ່ງວົງມົນຢ່າງສະຫງ່າງາມ ທ່າມກາງສາກຫຼັງຂອງຜືນດິນສີເຂັ້ມ

ເລື່ອງເລົ່າທາງປະຫວັດສາດກ່າວວ່າ ຢູ່ບ່ອນນີ້ ເຄີຍເປັນຈຸດປ່ຽນສຳຄັນຂອງສາດສະໜາໃນໄອສແລນ ເຮັດໃຫ້ສະຖານທີ່ແຫ່ງນີ້ບໍ່ໄດ້ງົດງາມພຽງຮູບຮ່າງ ແຕ່ຍັງປ່ຽມລົ້ນດ້ວຍຄວາມໝາຍ

ຈາກນັ້ນ ພວກເຮົາເດີນທາງຕໍ່ເຂົ້າສູ່ເມືອງ Akureyri ເມືອງຫຼວງແຫ່ງທິດເໜືອທີ່ຕັ້ງຢູ່ແຄມຟຢອດ ເມືອງນ້ອຍແຕ່ມີຊີວິດຊີວາ ເຮືອນຊານສີສັນສົດໃສລຽງລົງມາເປັນຂັ້ນຕາມໄຫຼ່ພູ

ແວ່ຊົມ Akureyrarkirkja ໂບດປະຈຳເມືອງທີ່ຕັ້ງຢູ່ເທິງເນີນສູງ ແນມເຫັນວິວເມືອງ ແລະ ຟຢອດທາງລຸ່ມ ກ່ອນຍ່າງຫຼິ້ນໃນຍ່ານເມືອງເກົ່າ ແວ່ຄາເຟ່ນ້ອຍໆ ອົບອຸ່ນທ່າມກາງອາກາດເຢັນ

ແລະ ຊຶມຊັບບັນຍາກາດຂອງເມືອງເໜືອທີ່ສະຫງົບແຕ່ມີສະເໜ່

ຄ່ຳຄືນນີ້ ພັກຜ່ອນທ່າມກາງອ້ອມກອດຂອງພູເຂົາ ແລະ ຟຢອດ

ພັກ: ເມືອງ Akureyri

ເຊົ້າ​ມື້​ນີ້ ພວກເຮົາອອກຈາກເມືອງທາງເໜືອ ມຸ່ງໜ້າສູ່ດິນແດນທີ່ທຳມະຊາດສະແດງພະລັງຢ່າງເຕັມຮູບແບບ ເສັ້ນທາງຄ່ອຍໆ ປ່ຽນເປັນພູມສັນຖານພູເຂົາໄຟ ພື້ນດິນສີເຂັ້ມສະຫຼັບກັບທົ່ງພຽງເວິ້ງວ້າງ

ກ່ອນເຂົ້າສູ່ເຂດທະເລສາບ Lake Myvatn ພື້ນທີ່ທີ່ໄດ້ຊື່ວ່າເປັນຫົວໃຈທາງທໍລະນີວິທະຍາຂອງປະເທດ

ພວກເຮົາຂັບຕໍ່ໄປຈົນສຽງຄຳຮາມຂອງສາຍນ້ຳເລີ່ມດັງຂຶ້ນຈາກໄລຍະໄກ ກ່ອນຈະປາກົດພາບຂອງ Dettifoss ນ້ຳຕົກທີ່ໄດ້ຊື່ວ່າແຮງທີ່ສຸດໃນເອີຣົບ ມວນນ້ຳມະຫາສານໄຫຼທະລັກລົງສູ່ຮ່ອມພູເລິກ

ສຽງກະແທກຂອງສາຍນ້ຳສະທ້ອນກ້ອງໄປທົ່ວບໍລິເວນ ລະອອງນ້ຳລອຍຟຸ້ງໃນອາກາດ ເຮັດໃຫ້ພວກເຮົາຮູ້ສຶກເຖິງພະລັງຂອງທຳມະຊາດຢ່າງແທ້ຈິງ

ຈາກນັ້ນ ເດີນທາງຕໍ່ໄປຍັງພື້ນທີ່ຄວາມຮ້ອນໃຕ້ພິພົບ Hverir ພື້ນດິນສີສົ້ມ ແດງ ແລະ ເຫຼືອງ ປົນເປກັນຄືຮູບແຕ້ມເໜືອຈິງ ບໍ່ຂີ້ຕົມຟົດບຸດໆ ແລະ ອາຍນ້ຳມາດພວຍພຸ່ງຂຶ້ນຈາກຮອຍແຕກແຍກຂອງໂລກ

ບັນຍາກາດຄືກຳລັງຢືນຢູ່ເທິງພື້ນຜິວດາວອັງຄານ ກິ່ນມາດໃນອາກາດເຕືອນໃຫ້ຮູ້ວ່າພະລັງໃຕ້ຜືນດິນຍັງຄົງມີຊີວິດຢູ່

ຊ່ວງບ່າຍ ພວກເຮົາກັບເຂົ້າສູ່ບໍລິເວນທະເລສາບ Lake Myvatn ຊົມຜືນນ້ຳກວ້າງທີ່ອ້ອມຮອບດ້ວຍພູມສັນຖານພູເຂົາໄຟ ແລະ ລາວາບູຮານ

ຮອຍແຕກແຍກເປືອກໂລກ ແລະ ຮູບຊົງຫີນລາວາແປກຕາກະຈາຍຕົວຢູ່ອ້ອມພື້ນທີ່ ແສງແລງຕົກກະທົບຜືນນ້ຳຢ່າງນຸ່ມນວນ ສ້າງພາບທີ່ສະຫງົບຕັດກັບຄວາມດິບຂອງທຳມະຊາດທີ່ພວກເຮົາຫາກໍ່ສຳຜັດມາ

ຄ່ຳຄືນນີ້ ພັກຜ່ອນທ່າມກາງຄວາມງຽບສະຫງົບຂອງດິນແດນພູເຂົາໄຟ

ທີ່ພັກ: ບໍລິເວນ Lake Myvatn ຫຼື ໃກ້ຄຽງ

ເຊົ້າມື້ນີ້ພວກເຮົາອອກເດີນທາງຕໍ່ລຽບຊາຍຝັ່ງທາງຕາເວັນອອກ ຖະໜົນຄົດລ້ຽວໄຕ່ລະດັບໄປຕາມແນວຟຢອດເລິກທີ່ໂອບລ້ອມດ້ວຍພູເຂົາສູງຊັນ ທຸກໂຄ້ງຖະໜົນເປີດມຸມມອງໃໝ່ຂອງທະເລສີເຂັ້ມຕັດກັບພູເຂົາແລະທ້ອງຟ້າກວ້າງ

ບາງຊ່ວງມີໝອກບາງລອຍຕ່ຳເໜືອຜິວນ້ຳ ເຮັດໃຫ້ບັນຍາກາດເບິ່ງງຽບສະຫງົບແລະງົດງາມຄືຮູບແຕ້ມ

ເສັ້ນທາງພາພວກເຮົາລົງສູ່ໝູ່ບ້ານນ້ອຍທີ່ເຊື່ອງຕົວຢູ່ໃນອ້ອມກອດຂອງຟຢອດ — Seyoisfjorour ເມືອງສິລະປະທີ່ງຽບແຕ່ມີຊີວິດຊີວາ

ຖະໜົນສາຍຮຸ້ງທອດຍາວນຳສາຍຕາໄປສູ່ໂບດສີຟ້າອັນເປັນເອກະລັກຂອງເມືອງ ເຮືອນໄມ້ຫຼາກສີລຽງລາຍແຄມອ່າວນ້ອຍໆ ແລະ ຜົນງານສິລະປະແຈກຢາຍຢູ່ທົ່ວເມືອງນ້ອຍແຫ່ງນີ້

ບັນຍາກາດຢູ່ນີ້ຕ່າງຈາກສ່ວນອື່ນຂອງໄອສແລນຢ່າງຊັດເຈນ — ອົບອຸ່ນ ອ່ອນໂຍນ ແລະ ມີຈັງຫວະຊີວິດທີ່ຊ້າລົງ

ຍ່າງຫຼິ້ນລຽບອ່າວ ຟັງສຽງລົມພັດຜ່ານຟຢອດ ສູດອາກາດບໍລິສຸດທີ່ເຢັນສົດຊື່ນ ກ່ອນເດີນທາງຕໍ່ເຂົ້າສູ່ພື້ນທີ່ຕອນໃນຂອງພາກຕາເວັນອອກ

ຄ່ຳຄືນນີ້ພັກຜ່ອນໃນເມືອງສູນກາງຂອງພາກພື້ນ

ທີ່ພັກ: ບໍລິເວນເມືອງ Egilsstaoir ຫຼື ພື້ນທີ່ໃກ້ຄຽງ

ເຊົ້າ​ມື້​ນີ້ ພວກເຮົາອອກເດີນທາງລົງສູ່ທິດໃຕ້ ເສັ້ນທາງສາຍຍາວພາພວກເຮົາຜ່ານພູມສັນຖານທີ່ກວ້າງໃຫຍ່ ແລະ ງຽບສະງັດ ກ່ອນທີ່ພາບຂອງພູເຂົາຊົງແຫຼມຄົມຈະຄ່ອຍໆ ປາກົດຂຶ້ນຊື່ໆໜ້າ

ພວກເຮົາຮອດບໍລິເວນ Stokksnes ບ່ອນທີ່ພູເຂົາ Vestrahorn ຕັ້ງສະຫງ່າເໜືອຫາດຊາຍສີດຳ ຮູບຮ່າງຄ້າຍຄືແຂ້ວປາສະຫຼາມຂອງມັນຕັດກັບທ້ອງຟ້າ ແລະ ທະເລຢ່າງສະຫງ່າງາມ

ໃນມື້ທີ່ຜິວນ້ຳນິ້ງ ພາບສະທ້ອນຂອງພູເຂົາເທິງຜືນຊາຍປຽກຈະຊັດເຈນຄືຮູບແຕ້ມທີ່ທຳມະຊາດສ້າງສັນຂຶ້ນເອງ ທຸກຍ່າງກ້າວເທິງຫາດຊາຍແມ່ນຊ່ວງເວລາທີ່ນິ້ງສະຫງົບ ແລະ ງົດງາມ

ຈາກນັ້ນ ເດີນທາງຕໍ່ໄປຍັງທະເລສາບນ້ຳກ້ອນອັນໂດ່ງດັງ Jokulsarlon ຜືນນ້ຳສີຟ້າເຂັ້ມທີ່ເຕັມໄປດ້ວຍກ້ອນນ້ຳກ້ອນຂະໜາດມະຫຶມາລອຍເອື່ອຍໆ

ບາງກ້ອນໃສຄືຄຣິສຕັລ ບາງກ້ອນແຕ້ມສີຟ້າອ່ອນຈາກອາຍຸຂອງນ້ຳກ້ອນ ສຽງແຕກຕົວຄ່ອຍໆ ຂອງທານນ້ຳກ້ອນທີ່ຫຼຸດອອກມາ ເຮັດໃຫ້ຮູ້ສຶກວ່າພວກເຮົາກຳລັງຢືນຢູ່ທ່າມກາງໂລກທີ່ຍັງຄົງເຄື່ອນໄຫວ

ບໍ່ໄກກັນແມ່ນຊາຍຫາດສີດຳທີ່ຜູ້ຄົນເອີ້ນວ່າ Diamond Beach ກ້ອນນ້ຳກ້ອນໃສທີ່ຖືກຄື້ນຊັດຂຶ້ນມາເກີຍເທິງຊາຍສີດຳລະຍິບລະຍັບເມື່ອກະທົບແສງແດດ ຄືກັບເພັດເມັດໃຫຍ່ກະຈາຍຢູ່ທົ່ວຊາຍຝັ່ງ

ພາບຊື່ໆໜ້ານັ້ນທັງບໍລິສຸດ ແລະ ເໜືອຈິງໃນເວລາດຽວກັນ

ຄ່ຳຄືນນີ້ ພວກເຮົາພັກຜ່ອນໃກ້ທະເລ ແລະ ທານນ້ຳກ້ອນ ໃນເມືອງຊາຍຝັ່ງທີ່ງຽບສະຫງົບ

ທີ່ພັກ: ບໍລິເວນເມືອງ Hofn ຫຼື ໃກ້ກັບ Skaftafell

ເຊົ້າມື້ນີ້ແມ່ນໜຶ່ງໃນປະສົບການທີ່ພິເສດທີ່ສຸດຂອງການເດີນທາງ ພວກເຮົາອອກຈາກບ່ອນພັກກ່ອນຂຶ້ນລົດ 4WD ມຸ່ງໜ້າເຂົ້າສູ່ພື້ນທີ່ທານນ້ຳກ້ອນ ເສັ້ນທາງຂຸລະຄ່ອຍໆ ພາພວກເຮົາເຂົ້າໃກ້ຜືນທານນ້ຳກ້ອນຂະໜາດມະຫຶມາ

ເມື່ອຮອດຈຸດໝາຍ ຜູ້ປະສານງານຜູ້ຊ່ຽວຊານຈະພາພວກເຮົາຍ່າງເຂົ້າສູ່ຖ້ຳນ້ຳກ້ອນທຳມະຊາດ Crystal Blue Ice Cave ພາຍໃນທານນ້ຳກ້ອນ ແສງທຳມະຊາດສ່ອງທະລຸຜ່ານຝານ້ຳກ້ອນໜາ

ເຜີຍໃຫ້ເຫັນໂທນສີນ້ຳເງິນເຂັ້ມຄືອັນຍະມະນີ ຜິວຝາໃສສະອາດສະທ້ອນແສງຢ່າງງົດງາມ ບັນຍາກາດງຽບສະຫງົບ ແລະ ເຢັນເຢືອກ

ທຸກຍ່າງກ້າວເຮັດໃຫ້ພວກເຮົາຮູ້ສຶກຄືກຳລັງຍ່າງຢູ່ພາຍໃນປະຕິມາກຳທີ່ທຳມະຊາດໃຊ້ເວລາຫຼາຍຮ້ອຍປີໃນການສ້າງຂຶ້ນ

ຊ່ວງບ່າຍ ພວກເຮົາເດີນທາງຕໍ່ເຂົ້າສູ່ເຂດຂອງ Skaftafell ເຊິ່ງເປັນສ່ວນໜຶ່ງຂອງອຸດທະຍານແຫ່ງຊາດ Vatnajokull ພູມສັນຖານຢູ່ນີ້ອ້ອມຮອບດ້ວຍທານນ້ຳກ້ອນ ພູເຂົາ ແລະ ລາວາບູຮານ

ພວກເຮົາຄ່ອຍໆ ຍ່າງໄປຍັງນ້ຳຕົກ Svartifoss ນ້ຳຕົກທີ່ໄຫຼຫຼຸດຫຼັ່ນລົງມາທ່າມກາງແທ່ງຫີນບາຊໍລຊົງຫົກຫຼ່ຽມຮຽງຕົວຢ່າງເປັນລະບຽບ ຄືກັບກຳແພງຫີນທີ່ຖືກອອກແບບຢ່າງຕັ້ງໃຈ

ຮູບຊົງເລຂາຄະນິດທຳມະຊາດນີ້ເຄີຍເປັນແຮງບັນດານໃຈໃຫ້ກັບສະຖາປັດຕະຍະກຳຫຼາຍແຫ່ງໃນໄອສແລນ

ແສງແລງສະທ້ອນຜິວນ້ຳ ແລະ ຝາຫີນສີເຂັ້ມ ສ້າງພາບທີ່ທັງສະຫງົບ ແລະ ຊົງພະລັງໃນເວລາດຽວກັນ

ຄ່ຳຄືນນີ້ ພັກຜ່ອນທ່າມກາງທຳມະຊາດອັນຍິ່ງໃຫຍ່

ທີ່ພັກ: ບໍລິເວນ Skaftafell ຫຼື ເມືອງ Vik

ເຊົ້າມື້ນີ້ພວກເຮົາອອກເດີນທາງລຽບຊາຍຝັ່ງຕອນໃຕ້ ເສັ້ນທາງທີ່ຖືເປັນພາບຈຳຂອງໄອສແລນ ຖະໜົນທອດຍາວຜ່ານທົ່ງລາວາ ພູເຂົາ ແລະ ທານນ້ຳກ້ອນທີ່ປາກົດຢູ່ໄກໆ ເປັນສາກຫຼັງຕະຫຼອດເສັ້ນທາງ

ຈຸດທຳອິດແມ່ນຫາດຊາຍດຳລະດັບໂລກ Reynisfjara ຜືນຊາຍສີດຳສະໜິດ ຕັດກັບຄື້ນມະຫາສະໝຸດແອດແລນຕິກທີ່ຊັດເຂົ້າຝັ່ງຢ່າງຊົງພະລັງ

ແທ່ງຫີນບະຊອນຊົງເລຂາຄະນິດລຽງຕົວເປັນຝາທຳມະຊາດ ແລະ ໂງ່ນຫີນກາງທະເລທີ່ຕັ້ງສະຫງ່າຄືກັບຍັກໃນຕຳນານ ທຸກອົງປະກອບເບິ່ງດິບ ເຂັ້ມ ແລະ ໜ້າຫຼົງໄຫຼໃນແບບຂອງໄອສແລນແທ້ໆ

ຈາກນັ້ນເດີນທາງຕໍ່ໄປຍັງນ້ຳຕົກຍິ່ງໃຫຍ່ Skogafoss ສາຍນ້ຳຂະໜາດມະຫາສານໄຫຼຕົກຈາກໜ້າຜາສູງກວ່າ 60 ແມັດ ມ່ານນ້ຳສີຂາວກະທົບພື້ນເບື້ອງລຸ່ມຈົນເກີດລະອອງນ້ຳລອຍຟຸ້ງ

ໃນມື້ທີ່ແສງແດດເໝາະສົມ ມັກປາກົດສາຍຮຸ້ງພາດຜ່ານນ້ຳຕົກຢ່າງງົດງາມ ຜູ້ທີ່ຕ້ອງການມຸມມອງຈາກດ້ານເທິງສາມາດຍ່າງຂຶ້ນຂັ້ນໄດລຽບໜ້າຜາ ເພື່ອຊົມວິວທີ່ກວ້າງໄກສຸດສາຍຕາ

ຊ່ວງບ່າຍພວກເຮົາກໍມາຮອດໜຶ່ງໃນນ້ຳຕົກທີ່ມີເອກະລັກທີ່ສຸດຂອງປະເທດ — Seljalandsfoss ຢູ່ນີ້ພວກເຮົາສາມາດຍ່າງອ້ອມເຂົ້າໄປດ້ານຫຼັງມ່ານນ້ຳ ແນມຜ່ານສາຍນ້ຳທີ່ໄຫຼລົງມາ

ເຫັນທິວທັດເບື້ອງໜ້າຜ່ານກອບນ້ຳຕົກ ເປັນມຸມມອງທີ່ທັງແປກໃໝ່ແລະໜ້າປະທັບໃຈ

ເມື່ອແສງແລງເລີ່ມອ່ອນລົງ ພວກເຮົາເດີນທາງກັບເຂົ້າສູ່ເມືອງຫຼວງ

ທີ່ພັກ: Reykjavik - The Reykjavik EDITION

ເຊົ້າມື້ສຸດທ້າຍເລີ່ມຕົ້ນຢ່າງສະບາຍໆ ໃນເມືອງຫຼວງ Reykjavik ເມືອງນ້ອຍທີ່ອົບອຸ່ນແລະມີຊີວິດຊີວາທີ່ສຸດຂອງປະເທດ ເຮືອນຊານສີສັນສົດໃສລຽງລາຍແຄມທະເລ ອາກາດບໍລິສຸດ ແລະ ຈັງຫວະຊີວິດທີ່ບໍ່ຮີບຮ້ອນ

ຍ່າງຫຼິ້ນເທິງຖະໜົນສາຍຫຼັກ Laugavegur ແວ່ເລືອກຊື້ຂອງຕ້ອນດີໄຊໄອສແລນແທ້ໆ ບໍ່ວ່າຈະເປັນງານຖັກໄໝພົມ ຂົນແກະ ເຄື່ອງປະດັບລາວາ ຫຼື ຂອງຕົກແຕ່ງສະໄຕລ໌ນໍດິກລຽບເທ່

ກ່ອນອຳລາເມືອງ ແວ່ຊົມຄວາມສະຫງ່າງາມຂອງ Hallgrimskirkja ໂບດສູງເດັ່ນທີ່ໄດ້ຮັບແຮງບັນດານໃຈຈາກແທ່ງຫີນບະຊອນທຳມະຊາດຂອງປະເທດ

ຖ້າມີເວລາ ສາມາດຂຶ້ນລິບໄປຍັງຈຸດຊົມວິວດ່ານເທິງ ເພື່ອແນມເຫັນຫຼັງຄາສີສົດຂອງເມືອງແລະເສັ້ນຂອບມະຫາສະໝຸດທີ່ທອດຍາວ

ຊ່ວງບ່າຍ ເດີນທາງສູ່ສະໜາມບິນ Keflavik International Airport ເພື່ອຕຽມຕົວເດີນທາງກັບໂດຍສະຫວັດດິພາບ

8 ມື້ຜ່ານໄປກັບໄຟ ນ້ຳກ້ອນ ລາວາ ຟຢອດ ແລະ ນ້ຳຕົກຍິ່ງໃຫຍ່ ໄອສແລນບໍ່ໄດ້ພຽງມອບພາບຄວາມງາມໃຫ້ພວກເຮົາ ແຕ່ຍັງມອບຄວາມຮູ້ສຶກຂອງອິດສະຫຼະ ແລະ ຄວາມຍິ່ງໃຫຍ່ຂອງທຳມະຊາດທີ່ຍາກຈະລືມເລືອນ

ແລ້ວພົບກັນໃໝ່… ໃນການເດີນທາງຄັ້ງຕໍ່ໄປ :)